‘उन्मेष’ प्रकाशनबद्दल सांगायचं तर साहित्यातल्या नवनवीन जाणीवांना, नवलेखकांना आणि निर्मितीतल्या प्रयोगशीलतेलाही आपलंसं करणारी, दर्जा आणि सातत्य याचं भान ठेवणारी ‘आजची’ प्रकाशनसंस्था म्हणता येईल.

पत्रकारितेची पदवी घेतल्यानंतर संपादनाचे धडे ‘माणूस’ साप्ताहिकामध्ये मनापासून अभ्यासता आले. लेखन, संपादन, मुद्रित शोधन, छपाई, बांधणी या साहित्यनिर्मितीशी संबंधित सगळ्याच घटकांची जवळून ओळख झाली आणि यातूनच पुस्तक निर्मितीच्या या उद्योगाला सुरुवात झाली.

१९८७ साली सुरू झालेली ‘उन्मेष’ ची वाटचाल कायम आनंददायक आणि आशावाद जागवणारीच वाटली.

उन्मेष प्रकाशनच्या प्रकाशित पुस्तकांचा आकडा आता सातशेच्यावर गेला आहे आणि एकूण तेवीस साहित्य प्रकारांमध्ये दर्जेदार पुस्तकांची निर्मिती केली आहे.
पुस्तक निर्मिती ही मला नेहमीच सृजनशील, आव्हानात्मक आणि संपादकीय प्रयोगशीलतेला आणि नाविन्याला वाव देणारी वाटली. नवीन विषय, नवीन लेखक यांना उन्मेषने कायमच महत्त्व दिलं. साहित्याच्या रूढ कल्पना महत्त्वाच्या आहेतच; पण त्याबरोबर माहितीपर साहित्य ललित गद्य रूपात मांडणारे कितीतरी विषय उन्मेष प्रकाशनाने सुरू केले. पालक, उपक्रमशील शिक्षक, आधुनिक स्त्रिया, कुमारवयीन वाचक यांच्यासाठीही पुस्तके प्रकाशित झाली आहेत. पुस्तकाची किंमत वाचकांना परवडणारी असल्यामुळे विक्रेते आणि वाचक यांनी विशेष जाहिरात न करताही पुस्तकांना उत्तम प्रतिसाद दिला. लेखक, वितरक आणि वाचक यांच्या प्रतिसाद आणि सहकार्यामुळेच कोणतीही मरगळ न येता पुस्तक निर्मितीचा हा व्यवसाय उत्साहाने चालू आहे. अक्षरजुळणी, छपाई, बाइंडिंग या तंत्रांमध्ये काळानुसार चांगले बदल झाले आहेत. ऑनलाईन विक्री यंत्रणा हा आता काळाचा भाग झाला आहे. सर्व महत्त्वाच्या ऑनलाईन माध्यमांतून, वितरकांकडून पुस्तक विक्रीसाठी सहकार्य मिळतेच आहे. या वर्षात डिजिटल माध्यमाचा जास्तीत जास्त उपयोग करून वाचकांपर्यंत आणि वितरकांपर्यंत पोहोचण्याचा प्रयत्न करायचा आहे.

उन्मेषसाठी ज्या लेखकांना लेखन सहकार्य देण्याची इच्छा आहे त्यांचे निश्चित स्वागत आहे. तसेच नवीन वाचक आणि वितरकांनीही ‘उन्मेष’ च्या पुस्तकांशी नाते निर्माण करून दृढ करावे ही विनंती.

स्नेहांकित
मेधा राजहंस
प्रकाशक